Kerk in konteks?

'n Inleidende blogpost, vir diegene wat wonder waaroor hierdie nuwe blog gaan.

Soos baie van julle mag weet vind die NG Kerk se Algemene Sinode volgende week (6 tot 10 Oktober) in Port Elizabeth plaas. Op die agenda (beskikbaar hier) dien sake soos Belhar en kerkeenheid, menswaardigheid, die ekologie, en homoseksualiteit. Jean Oosthuizen het juis gister in die Rapport daaroor 'n artikel geskryf (beskikbaar hier).

'n Paar van ons - almal NG Kerk-lidmate - het besluit om 'n blog te begin om gesprek tydens en na, maar veral voor, die Algemene Sinode te fasiliteer. Hierdie blog het ten doel om 'n virtuele gespreksruimte te skep waar so iets moontlik gemaak word, ook om energie en kritiese betrokkenheid by die sinodesitting te help skep. 

Daar is geen verskuilde agenda of voorafbeplande uitkomste nie. 'n Aantal skrywers - vanuit 'n verskeidenheid van agtergronde en met verskillende opinies - is uitgenooi om via hierdie blog deel te neem aan die gesprek, en te skryf en te publiseer na hartewens. Niks word gesensor nie, niks word gereguleer nie, niks word georganiseer nie, en sodoende hoop ons om op 'n organiese en natuurlike manier met mekaar in gesprek te tree. 

Die naam van die blog, 'Kerk in Konteks', is 'n poging om iets hiervan te verwoord. Die NG Kerk se grootste worstelinge tans, na my mening, is worstelinge met die uitdagings en verantwoordelikhede wat ons kontekste van ons vereis. Dit is uiteraard geen nuwe worsteling nie, en ook nie die laaste worsteling nie, maar 'n belangrike aspek hiervan is dat ons nie alleen kan worstel nie - dat ons mekaar nodig het in ons nadenke; dat ons stemme op die periferie van ons kerklike gemeenskap nodig het; dat ons stemme buite die kerk nodig het. 

Hierdie blog beperk ditself, vir nou, tot NG Kerk-lidmate, maar behoort as niks meer nie as deelname aan die groter gesprek oor kerkwees in Suid-Afrika en Afrika vandag beskou te word.

En oja, indien daar sommiges is wat die gesprek op Twitter sou wou voortsit, kan #kerkinkonteks gebruik word.

Nadia Marais